Plantun de Prouvènço

Pèr coumpara dos planto d'encò nostre

Rumex bucephalophorus & Ononis spinosa subsp. antiquorum

Rumex bucephalophorus

Polygonaceae

Noms en français : Oseille tête-de-boeuf, Rumex tête-de-boeuf.

Descripcioun :
Vaqui uno eigreto de l'an de la pichoto meno que trachis dins li terraire safrous. L'enflourajado èi longarudo emé de fueio à la baso. Li flour soun groupado en verticillo de 2 à 4 flour, li pecou soun vira devers lou bas. La subsp. de prouvènço ié dison gallicus.

Usanço :
Dèu èstre manjadisso coume lis àutris eigreto, mai avèn pas d'entresigne segur pèr aquelo planto.

Port : Erbo
Taio : 5 à 30 (50) cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Rumex
Famiho : Polygonaceae

Ordre : Caryophyllales

Coulour de la flour : Roujo
Petalo : 3
Ø (o loungour) flour : 0,5 mm
Flourido : Printèms - Estiéu

Sòu : Si
Autour basso e auto : 0 à 800 m
Aparado : Noun
Abriéu à setèmbre

Liò : Tepiero emé planto de l'an - Terraire safrous
Estànci : Termoumediterran à Mesoumediterran
Couroulougi : Mediterrano-Macarò
Ref. sc. : Rumex bucephalophorus L., 1753

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.